Crema de limón

 

Ingredientes:

  • 225 g de manteiga de leite
  • 200 g de azucre
  • 4 ovos
  • 250 ml de zume coado de limón
  • 10 g de maicena (1 culleradiña)
  • O relado de 2 limóns

 

Preparación:

  1. Mesturamos nun cazo o azucre xunto coa manteiga que quentamos para que funda
  2. Por outra banda mesturamos nunha cunca os ovos, a zume de limón, o relado maila maicena; batémolo ben e botámolo no cazo,
  3. Pomos o cazo no lume medio e sen que ferva remexemos ben coas variñas de man ata que calle; isto pode levar preto de 8 minutos. Coámola cun coador de arame e deixámola na neveira un par de horas dentro dunha cunca cun filme transparente pegado a crema para que ó arrefriar non faga codia.

 

Nota:

  • Non ten que chegar a ferver; hai quen na fai ó baño maría pero si podes controlar ben o lume podes facelo á fogo directo.
  • Podes gardala na neveira ata un par de semanas.
  • Esta receita pode valer tanto como recheo de tortas e pasteis, ou coma unha saborosa crema que se pode tomar soa. 

 

Tempo: 25 minutos                                                  Comensais: 4

Crema de laranxa

 

Ingredientes:

  • 400 ml de zume de laranxa coado
  • 80 g. de azucre
  • 5 xemas de ovos
  • 40 g. de maicena
  • O relado       dunha laranxa

 

Preparación:

  1. Mesturamos nun cazo o azucre, os ovos, a maicena mailo relado e remexemos ben para que no termos grumos de maicena; logo diso imos engadindo o zume ós pouco e mesturamos ben.
  2. Logo diso, pómo-lo cazo ó lume medio e remexemos coas variñas de man ata que espese. Non ten que chegar a ferver.
  3. Matémolo ben e gardamos na neveira metida nunha manga pasteleira ou pondo filme transparente en contacto coa crema para que non faga costra.

 

Nota:

  • Esta receita pode valer tanto como recheo de tortas e pasteis, ou coma unha saborosa crema que se pode tomar soa. 

Tempo: 25 minutos                                                  Comensais: 4

  •  

Boliños de vento reenchidos de crema de castañas

 

Ingredientes:

Para a masa:

  • 250 ml de auga
  • 150 g de fariña triga
  • 100 g de manteiga de leite
  • 4 ovos
  • Un chisco de sal

Para o recheo:

  • 250 g de castañas
  • 1 cullerada de anises
  • 1 vaso de nata
  • 2 culleradas de azucre

 

  • Preparación:
  1. En primeiras, preparámo-las castañas e para iso sacámoslle a pel grosa de fora e pómolas a coceren nunha pota con auga xunto cos anises polo decurso duns 25 minutos.
  2. Acendémo-lo forno a 200 ºC para que vaia quecendo
  3. Entanto, facémola masa dos boliños. Botamos nunha cazarola a auga xunto coa manteiga, o chisco de sal e pómola a ferver; cando comece a ferver afastámola do lume e engadimos de golpe a fariña e remexemos de seguido ata que estea todo ben mesturado. Deixamos arrefriar.
  4. Cando estea algo morno engadimos un ovo enteiro e cando xa estea absorbido engadímo-lo outro e así ata os catro ovos.
  5. Metémo-la masa nunha manga pasteleira e facendo uns montonciños do tamaño dunha noz grandiña, pómolos sobre unha bandexa das do forno cuberta con papel de enfornar. Deixamos unha separación entre eles para que non se apeguen cando crezan ó cocelos.
  6. Metémo-la bandexa cos boliños ó forno uns 15-20 minutos ata que estean cocidos e un chisco dourados.
  7. Nestes intres, as castañas xa estarán cocidas e agora, coa axuda dun coitelo con punta, pelámo-las sacándolles a pel que lles quedou.
  8. No vaso do batedor botamos as castañas, a metade da nata mailo azucre e trituramos todo. O triturado ten que quedar coma crema algo espesa pero axeitada para poder encher con ela os boliños, así que se cómpre engadimos máis nata.
  9. Metemos esta crema nunha manga pasteleira con boquiña rizada e imos enchendo os boliños logo de darlles un pequeno corte por arriba cun coitelo.
  10. Presentámolos adornando ó gusto.

 

Nota:

  • Para sacarlles a segunda pel ás castañas podes poñelas ó lume forte nunha tixola con testo durante uns poucos minutos vai probando e sácaas cando vexas que pelan. Coida que non asen moitos. Hai que pelalas deseguido; en quente pelan mellor. 

 

Tempo: 1 hora                                                           Comensais: 6-8

 Boliños de pataca e bacallau

 

Ingredientes:

  • 300 g patacas
  • 300 g de bacallau desalgado
  • 1 cebola branca (uns 300g)
  • 1 dente de allo
  • 1 ovo
  • 7-8 poliñas de perexil
  • Ovo e pan relado para rebozar
  • Aceite de oliva virxe
  • Sal

 

Preparación:

  1. Nunha cazarola cocémo-las patacas, uns 30 minutos, con pel en auga e so un chisco de sal, non moita.
  2. Noutra cazarola cocemos por 5 minutos o bacallau cun pouco de perexil, un cuarto da cebola e un chisco de aceite. Pasados este tempo quitámo-lo bacallau da auga e cando arrefríe sacámoslle as espiñas maila pel e esmigallámolo.
  3. En tanto cocen as patacas, nunha tixola con aceite amolecémo-lo resto da cebola picada miudiña a fogo maino cun chisco de sal ata que comece a dourar.
  4. Pasado o tempo quitámo-las patacas e logo de que arrefríen pelámolas e esmagámo-las cun garfo.
  5. Nunha cunca fonda mesturámo-lo bacallau coas patacas, o perexil picado, mailo ovo e cebola escoada, sen aceite. Probamos de sal e engadímoslle se cómpre.
  6. Coa axuda de dúas culleres facémolos boliños, rebozámolos en pan relado, ovo batido e pan relado; logo diso fritímolos nunha tixola con abondoso aceite ben quente ata que estean de cor dourada. O quitalos do aceite pousámolos en papel absorbente para que perdan escoen o aceite.
  7. Presentámolos nunha bandexa alongada adornados cunhas poliñas de perexil.

 

Tempo: 50 minutos                                                   Comensais: 4 persoas

Ameixas con alcachofas

 

Ingredientes:

  • 1¼ kg. de ameixas
  • 16 alcachofas
  • 2 dentes de allo
  • 300g de cebola branca
  • Fariña triga
  • ½ vaso de viño branco
  • Aceite
  • Sal

Preparación:

  1. Sacámoslles ás alcachofas as follas de fora ata que saian tenras, cortámoslles algo máis da metade cara a punta, pelámolo talo e metémolas en auga con zume de limón para que non oxiden.
  2. Cocémo-las alcachofas en auga con sal e 1-2 culleradas de fariña, deixándoas coceren 15-18 minutos; cando rematen de coceren reservámolas escoadas; reservamos aparte tamén algo de auga onde coceron.
  3. Picámo-los os allos miudiños e botámolos a fritir nunha tarteira con aceite quente e case deseguido engadímo-la cebola picada. Deixamos que amoleza todo a fogo maino sen que chegue a dourar.
  4. Engadimos na tarteira 2 culleradas de fariña; logo que refogue un chisco botámo-las ameixas, subímo-lo lume e tapa-la tarteira deixamos que se fagan ata que abran.
  5. Xa abertas, botamos o viño branco e cando evapore o alcohol engadimos ½ cullerón da auga das alcachofas.
  6. Botamos tamén as alcachofas cortadas pola metade e deixámolas coceren xuntas un 2-3 minutos, para que se mesturen os sabores e quezan.
  7. Levámolas á mesa, nunha bandexa de presentación, empoadas con perexil ben picado.

 

Nota:

  • Se non che gustan as alcachofas podes botar  chícharos

 

Tempo: 45 minutos                                                  Comensais: 6  

Albóndegas con ovos agochados

 

Ingredientes:

Para as albóndegas

  • 8 ovos
  • 400 g de carne picada de porco
  • 1 cebola nova (100g)
  • 1 allo porro, a parte branca
  • 1 dente de allo
  • 1 cullerada de perexil picado
  • 1 ovo
  • Pementa branca
  • Fariña, ovo e pan relado para rebozar
  • Aceite de oliva e sal

Para o prebe:

  • 1 cebola grande (300g)
  • 1 pemento verde italiano (100g)
  • ½ pemento vermello (150g)
  • 1 allo porro, a parte verde
  • 1 cenoria
  • 2 culleradas de tomate fritido
  • Caldo de carne

Elaboración:

  1. Pomos a cocer os ovos en auga con sal polo decurso duns 8 minutos; logo diso arrefriámolos, sacámoslles a casca e reservámolos.
  2. Namentres, picamos miudiños a cebola nova mailo allo porro e amolecémolos nunha tixola cun fondo de aceite e un chisco de sal.
  3. Logo diso mesturámolos coa carne picada mailo allo sen o xermolo para que non repita mailo perexil moi picadiños, o ovo batido, o sal necesario, pementa ó gusto e amasamos coas mans ben limpas.
  4. Afastamos uns 50 g desta mestura e co resto facemos 16 partes iguais.
  5. Cortámo-los ovos pola metade ó longo, sacámoslle a xema, mesturámola cos 50 g de carne afastada e reenchemos os ocos dos ovos.
  6. Esmagamos os 16 anacos de carne picada que temos reservados, facemos obleas redondas coas que envolvemos os ovos reenchidos e facemos 16 albóndegas
  7. Rebozámolas en fariña, e ovo e fritímolas en aceite ben quente; logo diso botarémoslles o prebe que faremos despois e deixarémolas cocer nel durante uns 5 minutos.
  8. Para facer o prebe, amolecemos, nuns 50 ml do mesmo aceite de fritirmos as albóndegas, a cebola, os pementos verde e vermello, a cenoria e a parte verde do allo porro, todos eles picados; cando estean moles, engadímo-lo tomate mailo caldo e deixamos cocer durante uns 15 minutos; logo diso triturámolo e botámolo nas albóndegas cos ovos agochados

 

Nota:

  • Se o prebe ficara pouco espeso podemos espesalo desfacendo maicena en aceite e engadirlla coada ó prebe. Tamén podemos botar, sempre coada, fariña desfeita en auga fría.
  • O mellor é comelas logo de darlles unhas horas ou ata 1 día de repouso.
  • Tamén podemos trocar o prebe por unha fritada de cebola e pemento verde italiano cortado en tiras e pemento vermello asado, tamén en tiras e algo de tomate fritido

 

Tempo: 50 minutos                                       Comensais: 4

Berenxenas á grella con cabala

 

Ingredientes:

  • 4 Berenxenas

Para o recheo:

  • 600g de cabalas
  • 1 cebola (200g)
  • 1 dente de allo
  • 3 tomates maduros
  • Aceite de oliva e sal

Para facer a salsa:

  • 1 cebola (200g)
  • 1 dente de allo
  • 100 g de pemento verde italiano
  • Caldo (uns 400ml)
  • Aceite de oliva e sal

 

Elaboración:

  1. Cortámo-las berenxenas pola metade ó longo, baleirámolas coa axuda dunha culler, picámola carne e reservámola.
  2. Fritímo-las cascas das berenxenas en abundante aceite quente e reservámolas
  3. Limpámo-las cabalas sacándolles a cabeza, as tripas, a pel mailas arganas e picámola carne en dados.
  4. Facémo-lo recheo: Nunha tixola con aceite amolecémo-la cebola mailo dente de allo a fogo maino; cando estean algo moles, tomate pelado sen pebidas e picado; case seguido incorporámo-la carne das berenxenas e deixamos que se faga uns minutos; logo diso botámo-la carne das cabalas e deixamos que se faga uns minutos máis. Rectificamos de sal.
  5. Agora facémo-la salsa: amolecémo-la cebola, o pemento mailo allo, todos eles picados, a fogo maino; logo botámoslle o caldo e deixámolo cocer durante uns 15 minutos. Cando estea un chisco espeso, triturámolo e pasámolo polo coador de arame.
  6. Reenchémo-las cascas de berenxenas con este recheo cubrímolas coa salsa e metémolas ó forno a grellar.
  7. Servímolas en pratos chairos decorados cunha cullerada da mesma salsa

 

Nota:

  • Podemos empregar xurelos, anchoas ou sardiñas cando é a tempada deles

 

Tempo: 40 minutos

Comensais: 4

Bacallau ó xeito antigo

 

 

Ingredientes:

  • ¾ kg. de bacallau salgado
  • 2 pementos vermellos
  • 2 cebolas cebola
  • 1 kg. de patacas
  • 1 vas0o de viño branco
  • 4 ovos cocidos
  • Perexil picado
  • Aceite de oliva e sal

 

Preparación:

  1. Desalgámo-lo bacallau, 48, 36 ou 24 horas segundo sexa de groso, mudándolle a auga cada 12 horas. Logo de desalgalo escamámolo e secámolo ben.
  2. Acendémo-lo forno e pómolo a máxima temperatura (240-250ºC) e asamos nel os pementos  untados con aceite e con unha chisco de sal por riba. Con 35 minutos terá dabondo. Tapámolos cun pano para que súe e logo pelámolos e reservámolos.
  3. Pelámo-las patacas e cortámolas en rebandadas de 1 cm. de groso e as cebolas en  media lúa.
  4. Nunha tarteira de barro ou nunha bandexa de levar ó forno facemos unha camada coas patacas, por riba arrombámola cebola. Salgamos, empoamos con perexil e regamos co viño branco e cun bo chorro de aceite de oliva
  5. Logo de asarmos os pemento baixámo-lo forno ata uns 220ºC e metemos nel a tarteira, tapada con papel de aluminio, polo decurso de 20 minutos,
  6. Entanto, fritímo-lo bacallau, envorcado en fariña, nunha tixola con aceite, volta e volta.
  7. Pómo-lo bacallau sobre a camada de patacas e cebola, tapamos co papel aluminio e volvemos meter ó forno, esta vez a 180ºC durante 15 minutos.
  8. Pasado o tempo quitámolo do forno e adornamos cos pementos cortados en tiras e os ovos, cortados ó longo, en cuartos.

 

Tempo: 45 minutos

Comensais: 4

Bacallau á Palleira

 

Ingredientes:

  • 4 talladas do lombo de bacallau desalgado
  • 2 pementos vermellos (400g)
  • 2 pementos verdes (400g)
  • 3 cebolas brancas
  • 3 dentes de allo
  • 5 patacas
  • Aceite e sal

 

Preparación:

  1. Cortámo-la cebola, os pementos mailo allo en xuliana e pómolos amolecer a fogo maino nunha tixola con aceite. Salgamos e tapamos cun testo para que amoleza mellor e non seque. Cando estea ben mol levantámo-lo lume e deixamos que doure un chisco.
  2. En tanto, nunha prancha ou nunha tixola un chisco de aceite pomos as talladas de bacallau para que se vaian facendo a fogo medio ata que estean algo douradas. (Uns 5 minutos)
  3. Pelámo-las patacas e cortámolas en lascas de 0,5cm. de groso e logo de salgalas fritímolas en aceite moi quente e abondoso ata que estean douradas.
  4. Facémo-lo montaxe do prato pondo unhas patacas embaixo e por riba a tallada de bacallau cuberta coa fritada de pementos e cebolas.

 

Tempo: 30 minutos

Comensais: 4 persoas

Ás de polo escabechadas con verduras

 

Ingredientes:

  • 12 ás de polo
  • 3 allos porros, só o branco
  • 2 cenorias
  • 100 g. de feixón verde
  • ½ cabaciño
  • 1 berenxena
  • 1 mañuzo de espárragos trigueiros
  • ½ cebola nova
  • 2 dentes de allo
  • 250 ml. de viño branco
  • 200 ml. de vinagre branco
  • 2 follas de loureiro
  • 2 pólas de tomiño
  • 1 culleradiña de pemento doce
  • Aceite de oliva, pementa en gran e sal

 

Preparación:

  1. Limpámo-las ás sacándolles as plumas mailas puntas e cortámolas pola xuntura.
  2. Empoamos con sal e pementa e fritímolas nunha boa cantidade de aceite ata que douren un chisco por fora
  3. Segundo vaiamos fritindo ímolas pasando a unha cazarola, á que lle engadímo-las follas de loureiro, as poliñas de tomiño, a cebola nova en xuliana, o viño, o vinagre, pementa, un chisco de sal, o pemento doce, máis unhas 5 culleradas de aceite limpo e deixámolo cocer todo xunto uns 30 minutos.
  4. Entanto fritímo-las ás, cortámo-las berenxena en rodas, que pomos con sal para que perda auga, o cabaciño en bastóns; o allo porro, as cenorias, mailos feixóns, en xuliana, sacámoslle ós espárragos a parte dura e para iso collémo-los espárragos polo pé e da metade ó mesmo tempo que dobramos para que rompan polo tenro; se fican longos cortámolos pola metade.
  5. Nunha tixola salteámo-las verduras cortadas sen xuliana ou en bastóns uns minutos; a berenxena facémola ó último á prancha, para darlle tempo a que perda toda a auga posible. Tódalas verduras teñen que quedar algo tenras.
  6. Montámo-los pratos pondo nunha banda os espárragos trigueiros e unhas rodas de berenxena; pola outra e montando un chisco por riba delas as ás escabechadas sen mollo e a un lado un montonciño de verduras variadas.

 

Notas:

  • As ás ó fritilas salpican dabondo e para evitalo ou que salpique menos podemos envorcalas nunha pouca fariña.

 

 

Tempo: 45 minutos

Comensais: 4

Páxina seguinte »